door nahin!

Main ghoom raha tha aawara akela,
raat shahar ki galiyon me,
jaise pagal bhanwara dar dar bhatke,
band kamal ki kaliyon pe,
man ki aakulta pag me bhar,
main chalta jata idhar udhar,
lagta tha jisko main dhoondh raha,
voh kahi paas hi hai, door nahi.

yeh hamari fitrat ka hi asar,
ki chandni bhi tan ko jalane lagi,
chalo ab chand taro ko bhi bigaadein,
rituein hamse ab muh churane lagi,
lagta tha jisko main dhoondh raha,
voh kahin paas hi hai, door nahi.

sapne

Tere mere, shaam savere,
kahi unjaale ,kahi andhere


man mera, dhalta suraj
gehre badal, julfein teri

main ekaki, tu bhi tanha
yaadon main aa sathi mere


khuli aankh se sapna jaisa,
teri aankh main aanshu mere

duniyaa jalim, sukhe upwan
door basayein , apana chaman

kya jaadu hai, main na jaanu
needien meri ,sapne tere

Main nahin hun!

Main ghazal hun,
Padhe koi
meri kismat,
gadhey koi

Main safar hun,
Chale koi
main akela,
miley koi

Main andhera hun,
jale koi
main chandan
maley koi

Main nahin hun,
Kahe koi!

Tumne kyon behka diya!

Phir milan ka geet ga kar,
tumne kyon behka diya!

tha main akela,
phir dikha wo najare,
aaj kyon behka diya

thokarein khata chala tha,
main nirash hi dhala tha,
daman tumne thaam kar,
aaj kyon behka diya

jindgi roothi hui thi,
aas bhi toti hui thi,
chand pyaare phool lakar,
chaman ko mehka diya

phir milan ka geet ga kar,
tumne kyon behka diya!

yaadein!

woh maagh ki ek raat thi,
chandni apne chaand ke saath thi,

kuhra kuch is tarah chaa raha tha,
ke kchitij ko main apne aur nazdeek paa raha tha,

chai aur sutte se uthta dhunaa bhi,
us badhti huii sardi ka ehsaas kara raha tha,

kapkapate badhte kadmo ko fir bhi ye ehsaas hai,
ke aane waali manzil liye ek garmi ka vishwas hai,

baglon mein dabe hue haath yoon machal rahe the,
jaise hum unhe pahli baar choone ko chal rahe the,

fir bhi har lamha har pal har uthte kadam ke saath
mujhe sirf teri yaad aa rahi thi,

sirf teri yaad aa rahi thi!

Meri jaan sun na!

This one is a proper Ghazal following all the rules of form of Ghazal. The meter of different shers might be a little off but I hope it is bearable :-)

kabhi hans ke thodi shikayat karenge, meri jaan sun na
ki sapno ki tanhai me kuch kahenge, meri jaan sun na.

range kore kagaz the pahle bhi maine, magar tumse mil ke,
ajab dard aaya hai nagmon me mere, meri jaan sun na.

Machalna to hai dil ki aadat purani, magar is dafa to,
buna dhadkano ne bhi hai ek tarana, meri jaan sun na.

jo taareekh me darz ho na sakin, aisi kuch daastanen,
shab-e-taar me gungunaate hain taare, meri jaan sun na
[shab-e-taar = dark night]

hawayen kahengi khwaish mere dil ki , magar apne muh se
kah na sakoonga main tumse ranjan, meri jaan sun na.

क्यों नहीं |

chalataa jaataa hai,
tu rukataa kyon nahiin.

chaahataa hoon baith kar aaraam karanaa,
par koi pedh milataa kyon nahiin.

pyaas bahut lagii hai,
par koi kuaan diikhataa kyon nahiin.

raaste main log bahut hai,
par dil kisii se milataa kyon nahiin.

manushay to hain kaee,
par maanavataa ko samajhataa koi kyon nahiin.

manjil ko pahachaanataa hai,
phir bhii aage badataa hai kyon nahiin.

chalataa jaataa hai,
tu rukataa kyon nahiin.